خالد سلێمان
ئەوانەی ڕەخنە لە سیاسەتی حکومەتی کوردستان هەرێمی و پارتی دیموکراتی کوردستان دەربارەی ڕەوشی رۆژئاوای کوردستان دەگرن، لەلایەن وتەبێژی ڕەسمی سەرۆکایەتی هەرێمی کوردستان-ەوە بەکەسانێک وەسف دەکرێن کە فرمێسکی "تیمساحیانە" دەڕێژن. لە بەیاننامەیەکدا کە ئەمڕۆ بڵاو کراوەتەوە سەرۆکایەتی هەرێمی کوردستان دەڵێت: "ئەوانەی فرمێسكی تیمساح دەڕێژن و لەمەڕ بارودۆخی ڕۆژئاوای كوردستان و بەرگریكردن لە گەلی كورد لە ڕۆژئاوا موزایەدە دەكەن
و لە هەمانكاتیشدا هەندێك لەوانە هەموو پێداویستیی ئەو بەرگریكردنەیان لەبەر دەست دایە با بفەرموون ئەوە سنوورەكان كراوەیە و بچن لەسەر ئەرزی واقع بەرگری لە گەلەكەمان لە ڕۆژئاوا بكەن ئەو كات بۆ خەڵكی كوردستان دەردەكەوێ كە موزایەدەكانیان چەندە یارییەكی بێبەهای سیاسییە و پڕیەتی لە چەواشەكردنی ڕای گشتی".
لەلایەکی ترەوە میدیاکانی پارتی دیموکراتی کوردستان هێڕشێکی توندیان کردوەتە سەر پارتی کرێکارانی کوردستان و هاوسەرۆکەکەی جەمیل بایک و لە ژمارەی ئەمڕۆی ڕۆژنامەی هەولێردا هاتووە: "لەدوای دەستپێكردنی شۆِرشی گەلانی سوریا، دۆسیەی سوریاو خۆرئاوای كوردستانی گرتووەتە دەستو لەو كاتەشەوە ژمارەیەكی یەكجار زۆر گەریلای بەڕێككەوتن لەگەڵ رژێمی سوریا ناردە ناوچەكانی خۆرئاوای كوردستانو كەوتە هاوكارییەكی ئاشكرا لەگەڵ رژێمو خۆشی دەزانێت پێشتریش بە چ شێوەیەك خەڵكی خۆرئاوای كوردستانی لەشارەكانیانو تەنانەت لەشاخەكانی كوردستانیش چەوساندووەتەوە".
لێرەدا چەند پرسیارێک هەن و ڕووبەڕووی سەرۆکی هەرێمی کوردستان و پارتی دیموکراتی کوردستان دەبنەوە، ئایا ئەم هێڕشانەی سەرۆکایەتی هەرێمی کوردستان و پارتی دیموکراتی کوردستان و دژایەتی کردنی چەندەها لایەنی سیاسی و ناولێنانیان بەو شێوەیەی لە هەڵوێستی سەرۆکایەتی هەرێم و راگەیاندنەکانی پارتیدا هاتووە، لە سەروبەندی بەستنی کۆنگرەی نەتەوەییدا خزمەتی کێ دەکات؟. ئایا لە کۆنگرەدا باسی چی دەکرێت، لەسەر قوڵایەکانی ستراتیژی نەتەوەیی دەبێت و تراژیدیای رۆژئاواو مەسەلەکانی مافی چارەی خۆنووسین و زمانی یەکگرتووی کوردی و بووژاندنەوەی کولتووری کوردی، ئەگەرلەسەر ئەم مەسەلانەو مەسەلەی تریش بن، ئەی چۆن لەم کاتەدا هێڕشێکی میدیایی فراوان دژی چەندەها لایەن و کەسایەتی و نووسەر بەرپا دەکەن تەنها لەبەر ئەوەی ڕەخنە لە پارتی دەگرن؟ ئەی چۆن دەتوانن لەگەڵ کەسانێکدا باسی کۆنگرەیی نەتەوەیی بکەن کە ئێوە بە موزایەدەچی وفرمێسک ڕێژی تیمساحاوی وەسفیان دەکەن.
من وەک ڕۆژنامەنووس و نووسەرێکی ئەم وڵاتە کە چەندین ساڵی ژیانم لەگەڵ کوردانی رۆژائاواو لە رۆژئاوا بەسەر بردوە، پێم وایە ئەگەر ئەمە جیهانبینی و ڕوانگەتان بێت بۆ ئەو کەسانەی ڕەخنەتان لێ دەگرن و ئەوەندە وەک بەکرمانجیەکەی رۆژئاوا دەڵێن "بینتان" تەنگ بێت، باشترە کۆنگرەی نەتەوەیی نەبەسترێت و کورد لە هەر پارچەیەکدا بەپێی بارودۆخی خۆی کێشەکانی چارەسەر بکات، چونکە بەم نەفەسەی ئێوە کێشەکان ئاڵۆزتر دەبن.
تعليقات