ئەم کورتە ڤیدیۆیەی لێرەدا دەبینرێت، ئەگەر تەنها ئارەزوویەکی ساتەوەختانەی خاوەنەکەی بێت یان جۆرێک بێت لە پیشاندانی ناسنامەو جیاوازخوازی ناو کۆمەڵگەیەکی نمایشکاردا، قسەی زۆر هەڵدەگرێت. یەکەم تێبینی ئەوەیە کە ئەم پیاوە “خەلیجی”یە بە زمانی ئینگلیزی قسە دەدوێت و داوای (چیزبەرگر) دەکات کە یەکێکە لە پێکهاتە سەرەکیەکانی چێستخانەی “گڵۆبالیزم”. ژینگەی ریستۆرانەکەو دیزاین و ئەوەی کاری تیادا دەکات پەیوەندی بە ژینگە “خەلیجی”یەکەوە نیە، هەروەها ئۆتۆمبێلەکانی بەردەم ریستۆرانەکە.
ئەوەی لەم ڤیدیۆیەدا ناسنامەی خەلیجی لە خۆ دەگرێت تەنها وشترەکەو جل و بەرگی کڕیارەکەیە. شتەکانی تر ئاماژەن بۆ دنیایەکی جیاواز لەوەی پیاوە قەتەرییەکە دەیەوێت دەریبخات. ژمارەیەک لەو تێبینیانەی لە سەر تۆڕە کۆمەڵایەتییەکان لەسەر ئەم ڤیدیۆیە نووسران، پێیان وایە ئەمە تەنها خۆ دەرخستنێکەو هیچی تر، هەندێکی تر پێیان وایە ئەمە هەست کردنە بە دابڕان لە ناسنامە. لە هەردوو حاڵەتەکەدا ئەم نمایشەی لە ڤیدیۆکە دەبینرێت، دەکرێت وەک ئیشالیەتێک لەو ئیشکالیەتانە تەماشا بکرێت کە شارستانیەتی نوێ دروستی کردوەو تاکەکانی خستوەتە بەردەم نامۆبوون و لێکترازانێکی گەورەی بۆ دروست کردوە لە نێوان ڕابوردوو/ئێستا، ڕەسەنایەتی/مۆدێرنە.
تعليقات